Tradhisi Ngudhuna

Ngudhuna utawa mudhun lemah salah sawijining tradhisi masyarakat Islam Jawa kang diwulangake dening Walisongo awit abad 15 M. Upacara ngudhuna dianakake amarga ana kapitayan masyarakat Jawa yen lemah kuwi nduweni makna ghoib lan dijaga Bathara Kala. Kanggo ngindari kadadeyan sing ora becik, mula dianakake upacara ngenalake bocah bayi marang Bathara Kala minangka sing njaga lemah.

Ngudhuna yaiku mudhune bayi kang umure wis pitung wulang. Ritual ngudhuna  nggambarake kesiapane bocah kanggo nglakoni urip kang bener ing mengkone kang oleh berkah saka Gusti Allah SWT lan tuntunan wong tuwa.

Acara mudhun lemah ing desaku bayi mau ora mudhun tenanan marang lemah. Lemah iku digantekake karo bubur cadil, yaiku jajanan kang digawe saka ketan lan aci, terus digawe bunder-bunder cilik, digodhog, ditambah santen lan gula jawa kang wis lumer. Saengga warnane  dadi kaya warna lemah kang coklat semu abang.

Sawise iku bayi digletakake ana ing klasa kang wis ana alat nulis, alat ibadah, klambi, dhuwit, jagung, tela, pari, kaca, jungkat, slendhang, alat paes. Bayi kuwi dijorake arep nyekel barang apa. Tuladhane nyekel jagung, dikarepake bocah bayi  iku mbesuke bisa dadi petani jagung kang sukses. Barang mau sing dipilih dening bocah iku kaya tandha besuk bakal duweni pagawean mau.

Acara iki diterusake nyebar dhuwit receh kang dicampur beras kuning. Wong tuwa lan nom-noman kang nyekseni padha rebutan kanthi ati bungah. Acara nyebar dhuwit iki dikarepake nalika wis gedhe bocah iku seneng tetulung marang wong liya, seneng wenehi sedekah lan digampangake rejekine.

Nalika acara pungkasan bubur cadil kang wis digawe dibagikake marang tangga teparo. Tegese pratandha minangka bocah bayi kang umur pitung wulan iku wis mulai bisa mudhun ing lemah, utawa wis mulai sinau ngadeg lan mlaku.