DUMADOSIPUN DHUSUN TEMBOK LUWUNG, KAB. TEGAL

     Amangkurat II (Pangeran Anom) sawetawis wekdal cumondhok wonten ing Kadipaten Jepara saperlu ngrekadaya ngrebat Mataram saking tanganipun Trunajaya. Adipati Tegal Martalaya wekdal menika tindak dhateng Jepara ngrawuhi wisudanipun para adipati nanging sepinten kagedipun Adipati Martalaya sasampunipun wisudan rampung Amangkurat II mbiwarakaken supados sedaya adipati kersa napakastani serat perjanjian ingkang isinipun Kumpeni Walanda purun mbiyantu ngrebat Mataram saking tanganipun Trunajaya kanthi sarat pesisir ler Pulo Jawa dipungadhekaken dhateng VOC. Adipati Martalaya mboten sarujuk kaliyan kersanipun Amangkurat II, Martalaya kanthi sora ngendika menawi ngantos pesisir ler dipungadhekaken dhateng Kumpeni Walanda namung badhe nambahi kasangsaranipun kawula alit. Adipati Martalaya lajeng kondur dhateng Tegal ninggalaken papan paseban.

         Kondur wonten Tegal Adipati Martalaya kados kagol penggalihipun menggalih kersanipun Amangkurat II. Nalikanipun saweg lenggahan ketungka sowanipun abdi Narantaka (Gendowor) matur bilih wonten tamu saking Jepara inggih menika Martapura. Wosing rembag Adipati Martapura kadhawuhan ngaturi Adipati Martalaya sowan Amangkurat II ing Jepara. Adipati Martalaya puguh mboten purun sowan dene Adipati Martapura ngrudhapeksa pramila lajeng perang dedreg kekalihipun pejah sampyuh.

          Sedanipun Adipati Martalaya njalari Narantaka (Gendowor) nesu, piyambakipun prasetya badhe numpes tuwin nyingkiraken Kumpeni Walanda saking laladan Tegal, pramila kanthi sesanti “Rawe-rawe rantas malang-malang putung” pindha bantheng ketaton pangamukipun Gendowor sawadyabala njalari Walanda kasoran. Kompeni Walanda nyuwun bantuan dhateng Amangkurat II wusana Amangkurat II rawuh ing Tegal. Gendowor badhe dipunwisuda dados Adipati Tegal sauger mboten mungsuhi Kompeni Walanda. Mireng pangandikanipun Amangkurat II, Gendowor mboten trima. Gendowor purun nglereni anggenipun mungsuhi Walanda sauger Kompeni Walanda kesah saking laladan Tegal. Panyuwunipun Gendowor dipunsarujuki Amangkurat II, wusana Narantaka (Gendowor) kawisudha dados Adipati Tegal.

      Narantaka (Gendowor) mujudaken pemimpin ingkang dipunajeni, dipunbekteni kawulanipun amargi panjenenganipun wicaksana, jujur, adil, nggatosaken kawula alit, gesangipun prasaja mboten ngowah-owahi. Panjenenganipun sanadyan adipati taksih kersa ngurusi piyambak kretanipun menawi tindak dhusun ngadhusun.

         Ing sawijinipun dinten nalika kondur saking dhusun Semeda, Adipati Narantaka sapendherekipun tindak ngilen, dumugi ing Kalipah panjenenganipun kendel namung saperlu mirsani suket ingkang ijo royo-royo. Panjenenganipun ngendika, “Suket ijo-ijo iku prayoga banget kanggo jaranku ing Kadipaten.”

              Pirsa kedadosan menika Nyai Narantaka lingsem dhateng pengawalipun lajeng matur,. “Kang Mas, panjenengan menika adipati kok inggih menggalih suket kangge kuda.” Anggenipun matur kaliyan nyablek pupunipun, Kanjeng Adipati Narantaka mboten nyana nalika Nyai Narantaka nyablek kakungipun astanipun nyenggol kendhali njalari kreta mlajar banter sanget. Nyai Narantaka bengok-bengok nyuwun tulung, sedaya pengawal lajeng mlajar nututi kreta ngantos Adipati Narantaka dipuntilar piyambakan.

                Mlajaripun kreta menggok ngidul dumugi ing dhusun Tembok, jaran tuwin kretanipun keluweng ngantos Nyai Narantaka mencelat saking kreta. Dhusun papan keluwengipun kreta ingkang dipuntumpaki Nyai Narantaka menika lajeng dipunwastani “Dhusun Tembok Luweng utawi Tembok Luwung.”

Kajarwakake sacukupe saka Legenda Kabupaten Tegal

Takwid Budiharso