KUMBAKARNA GUGUR

 

                Dasamuka utawa Rahwana iku ratu ing Negara Alengka, sekti mandraguna. Dasamuka iku putra pambayun Prabu Wisrawa karo Dewi Sukesi. Dasamuka duwe adhi telu, yaiku Kumbakarna, Sarpakenaka, lan Wibisana. Dasamuka anduweni sipat adigang adigung adiguna. Sipat sing kaya mangkene iki njalari Dasamuka sombong, seneng pamer, ngadirake sugih, sekti lan pinter.

                Dasamuka precaya banget marang kekuwatane dhewe lan sipat srakahe nguwasani jagad. Ing sawijining dina, Dasamuka kepengin nggarwa Dewi Sinta, garwane Raden Rama Wijaya kanthi cara ndhusta Dewi Sinta. Dewi Sinta bisa didhusta dening Dasamuka lan kaboyong ing Ngalengka.

                Raden Rama Wijaya duka amarga Dewi Sinta didhusta dening Dasamuka. Raden Rama ngumpulake bala rewanda, Kuthila, kethek, utawa palwaga kang dipandhegani dening Anoman. Sugriwa, Anggada, lan Anila nyerbu Alengka. Perang gedhe antaraning prajurit Ngalengka karo prajurite Rama Wijaya.

                Kumbakarna adhine Dasamuka kang awujud raseksa ngaturi pamrayoga marang raka yen tindake nyolong Dewi Sinta iku kliru. Mula, becike Dewi Sinta dibalikake marang Prabu Rama Wijaya. Nampa ature Kumbakarna, Dasamuka sewot banget. Kumbakarna diunek-unekake malah ditundhung minggat.

                Dasamuka lan prajurite kalah perang nglawan prajurite Rama Wijaya. Negara Alengka ajur mumur. Kabeh Senopati Ngalengka enthek. Kumbakarna sing isih seger beger sing dijagakake. Kumbakarna madeg senopati maju perang. Majune Kumbakarna ing perang ora mbelani kakange, nanging nglabuhi Negara sing diobrak-abrik dening prajurite Prabu Rama Wijaya. Kumbakarna eling yen mukti ing Ngalengka karo leluhur, bumi kelairan kudu ditohpati.

                Kumbakarna gugur ing peperangan. Kumbakarna satriya sing bisa ngrungkebi nusa bangsa nganti tumekaning pati. Sanadya Kumbakarna awatak utama, gugure Kumbakarna dipretheli awake dening jemparinge Raden Rama.