RAMA TAMBAK

                Prabu Dasamuka utawa Rahwana raja nagari Ngalengka ingkang awatake adigang, adigung, adiguna, lan sekti mandraguna. Wekdal semanten pikantuk palapuran adhinipun ingkang jejuluk Saepakenaka, bilih ing wana ingkang dados wewengkonipun wonten wanita ingkang ayu ing sulistya. Wanita wau boten sanes inggih Dewi Sinta garwanipun Prabu Rama Wijaya. Mangertosi bilih wanita wau ayu ing sulistya tan tanpa tandhing. Dasamuka kepengin nggarwa Dewi Sinta. Dasamuka reka daya kados pundi caranipun supados saged mboyong Dewi Sinta.

                Nalika Dewi Sinta piyambakan jalaran Prabu Rama ngoyak kidang kencana panyuwunipun Dewi Sinta ing alas Dhandhaka. Dasamuka lajeng memba-memba dados tiyang  sudra nyedaki papan panggenanipun Dewi Sinta. Dewi Sinta saged kadhusta kabekta mabur dhateng nagari Ngalengka.

                Cekak ing carita, Prabu Rama Wijaya anggenipun madosi Dewi Sinta sampun calut panggenan nagari Ngalengka. Prabu Rama nyuwun pitedah dhateng Sang Hyang Baruna. Miturut dhawuhing Sang Hyang Baruna, Prabu Rama supados nyiyagakaken wadya bala wanara ingkang dipun pandhegani dening Anoman, Sugriwa, Anila, Anggada supados nambaki seganten kangge nyabrang dhateng Ngalengka. Prabu Rama lajeng sami pirembagan anggenipun badhe damel tambak. Sasampunipun sadaya sarujuk saperangan wadya bala wanara dipundhawuhi ngusungi siti, sela lan ngantos redi ingkang badhe kangge damel tambak.

                Wadya bala wanara sadaya sengkut tumandang damel ngestokaken dhawuh kanjeng ratu dwi aji, pramila kirang langkung setengah sasi tambakipun sampun meh dados. Dumadakan boten ngertos sangka parane tambak ingkang meh dados wau risak malih. Boten mangertosi ingkang ngrisak bala tamtamanipun Dasamuka ingkang malih wujud dados yuyu raseksa. Para wanara jengkel, mangkel, lan meh mawon mutungi gawe. Ananging Prabu Rama ingkang dipun biyantu dening Anoman saged paring pangertosan lan paring pitedah dhateng para wadya bala wanara. Bala wadya wanara ingkang dipun pandhegani Anoman, Anggada, Anila, Sugriwa saweg ngrampungi damel. Tambak sampun dados lan saged kangge margi dhateng Ngalengka.

                Sesampunipun tambak dados, Prabu Rama, Anoman, Sugriwa, Anila, Anggada saged lewat tumuju ing Ngalengka. Dumuginipun ing Ngalengka dipun papagaken prajuritipun Dasamuka ingkang dipun pandhegani dening Indrajit putranipun Dasamuka. Ing pungkasanipun perang, Dasamuka saged kaperjaya dening Prabu Rama.