GATHUTKACA GUGUR

 

               Perang Baratayuda wis lumaku sawatara wektu. Bala Kurawa lan uga bala Pandhawa wis akeh sing padha tiwas dadi kurban perang ing palagan. Raden Abimanyu nganti tumekaning pati katrocok ing jemparinge para Kurawa. Sapatine Raden Abimanyu sang Dananjaya janji arep pati obong menawa ora bisa mateni sang Sindureja ing dina candhake. Awit sang Sindureja iku sing mungkasi Raden Abimanyu. Krungu janjine sang Dananjaya, kadang Kurawa bungah. Sang Sindureja disingidake, ewadene meksa mati dening senjatane Raden Arjuna.

                Sapatine Arya Sindureja, Prabu Suyudana ngarih-arih ingkang raka Adipati Karna, gelema ngetog kadegdayan numpesna wadya bala Pandhawa. Adipati Karna nyaguhi pamundhute Prabu Suyudana, sanadyan ta ngadhepi perang mungsuh kadang kadang dhewe lan prunane. Adipati Karna rumangsa kapotangan budi jalaran sasuwene suwita ing Ngastina, Adipati Karna kamuktekake dening Prabu Duryudana, nganti dijumenengake dadi bupati ing Ngawangga. Ngelingi bab iku mula sang Adipati Karna esuke banjur budhal ing palagan perang. Pangamuk Adipati karna ngrusak wadya balane Pandhawa, nanging wadya bala Kurawa uga akeh sing rusak, awit pangamuke Werkudara. Nganti angslupe srengenge Adipati Karna ora gelem mandheg perange nantang senopati Pandhawa.

                Sang Prabu Kresna banjur dhawuh Raden Gathutkaca murih mapagake pangamuke uwane. Raden Gathutkaca mangkatake wadya bala Pandhawa, tempuk mungsuh danawa utusane nata Kurawa. Perange rame banget, padha dene galak, tegel, lan mental, loro-lorone padha bae nggawa obor. Akeh wadya bala Kurawa sing mati, kaidak dening Raden Gathutkaca. Jalaran kahanan peteng ndhedhet sing katon mung cumlorote obor, Adipati Karna banjur njemparinge ngawur pesate jemparinge ngebaki langit.

                Raden Gathutkaca tumiyub saka langit cepet-cepet ngrampungi perang, suwarane gumlegar nggegirisi. Wusana Adipati Karna nglepasake senjata Kunta, sanjata pamungkas paringane Dewa. Lumepas ngenani jajane Raden Gathutkaca sing lagi cumlorot arep nrejang Adipati Karna. Adipati Karna ngendhani nanging kusire ajur dienjlogi Raden Gathutkaca.

                Raden Adipati Karna legeg penggalihe priksa yen putrane adine tewas kena senjatane. Nanging kepriye maneh Adipati Karna rumangsa kaluberan budi dening Kurawa, pengin males kabecikan sanadyan kudu ngadhepi kadang Pandhawa, ora liya adhine dhewe tunggal ibu yaiku Dewi Kunthi.