Kapan nyawang

Sumribit angin ngelus sore

Manuk sriti padha bali ing pucuking cemara

nganti wengi kang nyenyet tumeka

Sumunar padhang kaapit mega-mega

bareng karo petenging wengi

Angin wengi iki tansah ngancani

anggonku nyawang cahyamu

Tekamu tansah reruntungan

Katon kemelip ing angkasa

Gawang-gawang katon pasuryanmu

gawe tentreming ati iki

Lintang-lintang abyor ing tawang

cumlorot sliweran nalika alihan

Kumleyang menclok ing socamu asihku

Cahyamu gumebyar sumunar gilar-gilar

Lintang-lintang padha alihan

Cumlorot telu ing pundhakku

Kawitan lintang abang lintang perang

Kapindho lintang mirunggan, lintang kamanungsan

pungkasan lintang kumukus, lintang kadurakan

 Tetty Fitria